أنا الليل ...

أفهموني ... أدخلوا لعالمي واتبعوني

أنا ما أعاني ... لكن أخليك يا أمي تعاني ...

أنا ما أعاني .. لكن أخليك يا أبوي تعاني ...

أنا ما أعاني .. لكن أخليك أستاذي تعاني ..

أشوفكم حولي وقوف .. ودي أحكي .. لكن الموقف يطوف

أنا أشوف .. وأنا أسمع .. وأنا أرى ... لكن جدار غريب .. موقفني ورى

ورى رغبتي .. ورى لهفتي

لقول أمي..لقول أبوي

لقول أختي .. و أخوي

لقول اسمي .. لتحديد عمري

أنا بالمحبة .. كاتم شعور

والأماني..يحيطها سور

سور اللغة .. سور التواصل .. واللعب .. وسور إضطرابات  السلوك

سور الرفرفة .. كل جرح بعين أمي تنزفه ..

ما هو بيدي .. و أنت يا أستاذي تدري ..

بلغ أمي .. وأشرح لها وضعي .. في بيتي وصفي

وبلغها .. إن التدريب لمثلي يكفي ..

لكن بضوابط ...

أنت وأسرتي .. تكونوا بصف واحد

و أوعدكم تشوفوا مني  أنا واجد ..

راح تشوفوا قدرتي ..

أنا عاشق للنظام .. ولو تدربت لنشاط .. أتقنه بالتمام..ولو اشتغلت شغله .. أواظب عالدوام...

أنا روتيني كثير .. نفس كوبي نفس صحني ..نفس اللبس..نفس المكان

هذا عالمي .. لا تكسروه .. دامه ما يضر ...

أنا الليل وأنتم لعيوني .. فجر !!

يا أبوي وأمي لا تلوموا بعض ..

وينظر الواحد لواحد .. ويقول أنت السبب ..

يا أبوي ..

خلك معي بتفتخربي ..

يمكن ماني .. مثل باقي أخواني وربعي..

أنت القلب القوي .. وأنت الشخص الوفي ..

يا أمي ..

يالصدر الحنون ..  لو لاك أنتي من أكون ..

لا تحزني .. خلي الفرح يلون عالمك وعالمي ..

أنا نعمة .. ماني نقمة

أنا عطيه من رب البريه ...

وهبني لكم .. حسنة وأمحي لكم سيئة ..

وهبني لكم رحمة .. وكلكم تتمنوا الرحمة ..

أحمدوا الله و أشكروه .. أنا بكون حكمه لشيء تجهلوه

بالصبر ... يرزقكم الله الجنان .. وهو الكريم المعطي المنان ...

نواف نايف السريحي

يشرفني ان تكون هذه مشاركتي الفعليه الأولى ....